У сельскай гаспадарцы патрэбна, як у арміі, жалезная дысцыпліна - Вальфовіч

У сельскай гаспадарцы патрэбна жалезная дысцыпліна, такая ж, як у арміі. Ад яе, у тым ліку і асабістай, залежыць вынік работы аграрнага сектара. Аб гэтым перад сустрэчай са студэнтамі Гродзенскага дзяржаўнага аграрнага ўніверсітэта сказаў журналістам дзяржаўны сакратар Савета бяспекі Аляксандр Вальфовіч, перадае карэспандэнт БЕЛТА.

Як адзначыў Аляксандр Вальфовіч, нацыянальная бяспека мае шмат складнікаў. "Гэта вельмі шырокі комплекс, і ён не толькі ахоплівае пытанні ваеннай бяспекі", - падкрэсліў дзяржаўны сакратар Савета бяспекі. У нашай краіне вельмі шмат увагі надаецца гэтым пытанням, бо абстаноўка навокал патрабуе гэтага. "Мы ні на каго не збіраемся нападаць, але мы рыхтуемся абараняць сваю краіну", - дапоўніў ён.
"Нацыянальная бяспека складаецца з дзевяці сфер. Гэта і харчовая бяспека, наш брэнд, канёк нашай краіны - малочная прадукцыя, мясная, прадукцыя лёгкай прамысловасці і гэтак далей. Таму, што датычыцца пытанняў бяспекі, трэба глядзець шырока", - заявіў дзяржсакратар Савета бяспекі.

Аляксандр Вальфовіч заўважыў, што, працуючы летам у час уборачнай кампаніі як упаўнаважаны па Гродзенскай вобласці, у палях, дапамагаючы кіраўнікам гаспадарак у вырашэнні арганізацыйных пытанняў па ўборцы ўраджаю, сустракаўся не толькі з кіраўніцтвам сельгаспрадпрыемстваў. "Гэта аграномы, заатэхнікі, ветэрынары і іншыя спецыялісты. А (даведацца. - Заўвага БЕЛТА) як іх рыхтуюць, у мяне да гэтага, на жаль, не даходзілі рукі. Таму сёння, працуючы ў Гродзенскім гарнізоне, паставіў для сябе мэту сустрэцца са студэнтамі Гродзенскага аграрнага ўніверсітэта. З тымі хлопцамі і дзяўчатамі, якія - будучыня нашай краіны ў галіне сельскай гаспадаркі. Паслухаць іх, чым жывуць, што яны думаюць, якія ў іх пытанні, расказаць пра ваенна-палітычную абстаноўку, сітуацыю ў свеце", - звярнуў увагу ён, дадаўшы, што хоча нагадаць маладым людзям і аб падтрымцы дзяржавай спецыялістаў аграрнай сферы.