Гродзенская і Самаркандская вобласці падпісалі дарожную карту для пашырэння супрацоўніцтва

 Гродзенская і Самаркандская вобласці (Узбекістан) маюць намер паглыбляць узаемадзеянне. Гэта замацавана падпісаннем дарожнай карты для пашырэння супрацоўніцтва паміж рэгіёнамі ў гандлёва-эканамічнай, інвестыцыйнай, прамысловай, сельскагаспадарчай і гуманітарнай сферах, перадае карэспандэнт БЕЛТА.

Сёння ў Гродне адбылася сустрэча старшыні Гродзенскага аблвыканкама Юрыя Караева з хакімам Самаркандскай вобласці Адзізам Бабоевым і дэлегацыяй гэтага рэгіёна пры ўдзеле пасла Узбекістана ў Беларусі Нурыдзіна Мамажонава.

Кіраўнік Гродзенскай вобласці адзначыў, што гэта ўжо трэці візіт дэлегацыі Самаркандскай вобласці ў Гродна за год. "Для рэгіёнаў настаў час дзейнічаць: супрацоўнічаць у прамысловай кааперацыі, укладвацца ў сельскагаспадарчыя тэхналогіі, ствараць сумесныя вытворчасці і разам замацоўвацца на рынках трэціх краін", - сказаў Юрый Караеў.

Паводле яго слоў, ёсць інтарэс у забеспячэнні кадрамі, у першую чаргу сельскай гаспадаркі беларускага рэгіёна, а таксама ў сферы будаўніцтва, жыллёва-камунальнай гаспадаркі. У сельскай гаспадарцы ёсць вопыт паспяховага прыцягнення інвестыцый, што датычыцца знешняга гандлю, то тавараабарот паміж рэгіёнамі ў мінулым годзе павялічыўся ў 1,5 раза, а ў бягучым годзе яшчэ на трэць. "Вельмі шмат яшчэ напрамкаў: супрацоўніцтва ў лясной гаспадарцы, пастаўкі ялавічыны, турызм. Санаторыямі нашымі яны зацікавіліся і спадзяюцца нашых жыхароў зацікавіць сваімі прыгожымі мясцінамі і санаторыямі, - расказаў Юрый Караеў. - Наша задача - звесці спецыялістаў па напрамках, каб яны абмяняліся кантактамі, даведаліся, што каму цікава, і пачалі працаваць".

Як адзначыў начальнік аддзела па рабоце з міжнароднымі партнёрамі хакіміята Самаркандскай вобласці Жамшыд Уракоў, абазначаны некалькі напрамкаў для ўзаемадзеяння. "Гэта сумесная работа ў сельгассферы, прамысловая кааперацыя, узаемныя інвестыцыі, турызм, ахова здароўя, абмены ў адукацыі і навуцы. Па гэтых напрамках мы хочам разам з партнёрамі ў Гродзенскай вобласці працаваць у бліжэйшы час", - сказаў ён.

Жамшыд Уракоў звярнуў увагу, што асабліва важны вопыт супрацоўніцтва ў сферы АПК. "У нас рабочая сіла ёсць, ёсць вопыт у сельгасработах. Узбекістан у сельгассферы займае ганаровае месца ў Цэнтральнай Азіі. Беларускі вопыт будзе карысны для ўзбекскіх прадпрымальнікаў. Можна сумесна папрацаваць у сельгаснапрамку, і нашы прадпрымальнікі гатовы", - расказаў ён.

На сустрэчы таксама адзначана важнасць развіцця пабрацімскіх сувязей паміж гарадамі і раёнамі. Падтрымана прапанова аб устанаўленні пабрацімства паміж Гроднам і Самаркандам, Лідскім і Постдаргомскім раёнамі.

БЕЛТА