"Навучыліся спраўляцца". Юрый Караеў расказаў, як Гродна ліквідуе наступствы магутнай стыхіі

 Аб наступствах непагоды ў Гродне, а таксама ў Воранаўскім і Шчучынскім раёнах і іх устараненні расказаў журналістам старшыня Гродзенскага аблвыканкама Юрый Караеў, перадае карэспандэнт БЕЛТА.

Каменціруючы наступствы суботняй стыхіі ў Гродне і навядзенне парадку, Юрый Караеў адзначыў, што ў суботу выпала неймаверная колькасць ападкаў. "33 мм ападкаў за дзве гадзіны пры месячнай норме 57. Удар стыхіі атрымаўся такі, што не спраўлялася ліўневая каналізацыя", - сказаў ён.

"Вельмі аператыўна спрацавалі ўсе аварыйныя службы. Мэр горада Андрэй Хмель, усе яго намеснікі, і электрасеткі, і МНС, аварыйныя службы - усе на нагах з вечара, - сказаў кіраўнік вобласці. - Горад - вельмі складанае збудаванне, у першую чаргу з-за камунікацый".
Юрый Караеў адзначыў, што вялікая колькасць званкоў паступіла на лінію 115. "Я ўчора хадзіў па горадзе, людзі падыходзілі, даведваліся, у асноўным спачувалі, што давялося з такім аб'ёмам работ сустрэцца аварыйным службам. У нас людзі вельмі свядомыя, разумеюць адразу, якая нагрузка навалілася, дзякавалі за аператыўнае ўстараненне, але ў тым ліку скардзіліся, што на 115 не дазваніцца. І мы сёння на планёрцы для сябе вывады зрабілі, што разам з аварыйшчыкамі трэба падымаць па трывозе, мабілізаваць і павялічваць тых, хто будзе прымаць званкі", - дадаў ён.

Тыдзень таму непагода закранула Воранаўскі і Шчучынскі раёны. "Прыкладна на 4 тыс. га пацярпеў ураджай, - дадаў Юрый Караеў. - Мы папярэдне палічылі наступствы. Рапс застрахаваны, па астатніх (культурах. - Заўвага БЕЛТА) - мы дапаможам". Кіраўнік рэгіёна дапоўніў, што аблвыканкам абавязкова падставіць плячо пацярпелым гаспадаркам. Ён таксама падкрэсліў, што работа вялася па ўсіх напрамках, і, як гэта заведзена ў беларусаў, дапамагалі ўсёй грамадой. "Навучыліся мы ўжо з гэтымі ўраганамі спраўляцца, хутка рэагаваць. На жаль, яны часта апошнім часам", - заўважыў Юрый Караеў.