Свята бульбы і хлеба. У Бераставіцкім раёне прайшоў фестываль “Бульба – МЭБ”

З 2018 года ў Малой Бераставіцы праходзіць фестываль “Бульба – МЭБ”, арганізаваны ў гонар любімага ўсімі беларусамі прадукта, які называюць другім хлебам, паведамляе Бераставіцкая газета. І гэта не выпадкова, бо менавіта тут  знаходзіцца прадпрыемства «Малабераставіцкі элітгас», якое спецыялізуецца на вырошчванні элітнага насення бульбы. Кожны год у гаспадарцы вырошчваюць 9 сортоў гэтай культуры — стойкіх да хваробаў і з добрымі смакавымі якасцямі. Прымяненне перадавых тэхналогій дазваляе атрымліваць ураджайнасць бульбы звыш 356 ц/га і штогод рэалізаваць да 388 тон насенных клубняў эліты. Але не толькі бульбе традыцыйна прысвячаецца “Бульба – МЭБ”. У першую чаргу гэта свята ўшаноўвае герояў жніва — тых, хто ў спёку і непагадзь, з ранку да ночы працаваў на хлебнай ніве і паклапаціўся, каб на нашах сталах заўсёды быў хлеб і да хлеба.

Вось і 26 жніўня аграгарадок Малая Бераставіца гасцінна запрасіў усіх жадаючых раздзяліць разам з працаўнікамі гаспадаркі радасць ад завяршэння ўборачнай кампаніі і падзякаваць тым, хто зрабіў усё магчымае, каб кожнае вырашчанае зярнятка трапіла ў агульны каравай.

Менавіта ён, каравай новага ўраджаю, быў урачыста ўручаны ў пачатку мерапрыемства гаспадару свята – дырэктару адкрытага акцыянернага таварыства «Малабераставіцкі элітгас» Міхаілу Болбату і першаму намесніку старшыні – начальніку ўпраўлення сельскай гаспадаркі і харчавання Бераставіцкага райвыканкама Аляксандру Курыла.




Аляксандр Курыла  ад імя раённага выкакаўчага камітэта і раённага Савета дэпутатаў шчыра  павіншаваў працаўнікоў ААТ “Малабераставіцкі элітгас”  з паспяховым завяршэннем жніва.

— Усе гаспадаркі раёна завяршылі ўжо ўборачную кампанію,  — адзначыў Аляксандр Васільевіч. — У засекі раёна засыпана 89 тысяч тон зерня новага ўраджаю, сярэдняя ўраджайнасць склала  66 цга. У агульны каравай значны ўклад унесла і ваша гаспадарка, вы выйшлі на чацвёртае месца ў раёне з ураджайнасцю  збожжавых 71,8 ц/га, а па ўраджайнасці азімага рапсу – 67,5 ц/га  — ААТ “Малабераставіцкі элітгас”  знаходзіцца на першым месцы  ў раёне. Усе гэтыя паказчыкі дасягнуты дзякуючы высокаму прафесіяналізму  працаўнікоў вашай гаспадаркі. Дзякую ўсім вам за працу, жадаю моцнага здароўя, дабрабыту, мірнага неба над галавой і новых дасягненняў.



Героям хлебнай нівы, якія дасягнулі значных поспехаў у працы, Аляксандр Курыла ўручыў граматы і  падзячныя лісты ад раённага выканаўчага камітэта і Бераставіцкага райкама прафсаюза работнікаў аграпрамысловага комплексу.

Прадоўжыў ўшанаванне хлебаробаў  дырэктар ААТ “Малабераставіцкі элітгас”  Міхаіл Болбат. Граматы, грашовыя прэміі, памятныя падарункі ад  кіраўніцтва гаспадаркі і  сертыфікаты аб занясенні на Дошку гонару атрымалі на свяце камбайнёры, вадзіцелі аўтамабіляў, аператары зернесушыльных комплексаў і іншыя працаўнікі, датычныя да жніва.  



Паколькі “Бульба – МЭБ” – брэндавае свята “другога хлеба”, то і гэтай культуры была аддадзена належная ўвага. Фотазона з помнікам бульбе прыцягвала ўвагу тых, хто любіць рабіць святочныя фотаздымкі.



Побач размясцілася выстава элітных гатункаў бульбы, якія вырошчваюцца ў ААТ “Малабераставіцкі элітгас”.



Яшчэ адну выставу арганізавала і раённая бібліятэка – тут можна было даведацца ўсё пра бульбу – “другі хлеб” беларусаў.  



А яшчэ гасцей свята чакала і дэгустацыя бульбяных прысмакаў – мясцовыя повары прыгатавалі цэлы шэраг страў з усімі любімай бульбачкі і частавалі імі ўсіх жадаючых. А ў дапаўненне прапаноўвалася прадукцыя ААТ “Малочны мір” і ААТ “Ваўкавыскі мясакамбінат” , а таксама салодкія  прысмакі ад Бераставіцкага каледжа.




Яркім момантам свята стала і адкрыцце новай крамы «Элітны»,  чырвоную стужку ўрачыста перарэзалі Міхаіл Болбат І Аляксандр Курыла, а затым адбылася бясплатная раздача марожанага і шампанскага для прысутных, розыгрышы для дзяцей.



Дарэчы, для юных жыхароў і гасцей Малой Бераставіцы было падрыхтавана вельмі шмат прыемных сюрпрызаў. Яшчэ да пачатку афіцыйнага адкрыцця свята для іх была арганізавана гульнёва-забаўляльная праграма “Малабераставіцкая рассыпуха” з разнастайнымі гульнямі і конкурсамі.  Нямала эмоцый дзецям падарыла таксама шоу мыльных бурбалак і пенная вечарынка, увесь час працавалі ўсімі любімыя атракцыёны, аквагрым, прадавалася салодкая вата, папкорн і іншыя прысмакі.




Ды і дарослыя таксама не сумавалі. Сапраўдным упрыгожаннем свята стала яго музычная афарбоўка. Прыемныя эмоцыі і цудоўны настрой гасцям свята стваралі артысты Бераставіцкага цэнтра культуры і народнай творчасці, артыстка Моладзевага тэатра Зінаіда Фурор  і суперфіналістка шоу “Х-Фактар Беларусь” Анастасія Краўчанка з  Мінску,  а таксама кавер-бэнд “Hit Hunter” з Гродна.




Завяршыўся “Бульба-МЭБ” піратэхнічным шоу фантанаў і дыскатэкай пад адкрытым небам “Танцуй разам з намі!”

Жыхары Малой Бераставіцы дзеляцца ўражаннямі ад свята:

Тамара Канецкая з сынам Максімам:

— Свята нам вельмі падабаецца,  для дзяцей тут сапраўдны рай! Яны ў захапленні ад  атракцыёнаў і гульняў, ад пеннай вечарынкі  і бясплатнага марожанага. А яшчэ цудоўны настрой падарылі ўсім канцэртныя выступленні як мясцовых артыстаў, так і знакамітых гасцей. Хочацца падзякаваць арганізатарам за добрую арганізацыю і прадуманую праграму, якая задаволіла, я думаю, усіх.

Эдвард Ражко:

— Хлебаробы заслужылі гэта свята сваёй нялёгкай працай на жніве, і сёння разам з імі святкуе ўвесь наш аграгарадок. Праграма вельмі насычаная, ёсць на што паглядзець і дарослым, і дзецям. Прыемным падарункам для ўсіх нас стала  адкрыццё новай крамы, з шырокім асартыментам тавараў і даступнымі цэнамі. Цікава, ярка, весела – так праходзіць наш “Бульба-МЭБ”!